ആഗോള സെമികണ്ടക്ടർ വ്യവസായവും ഇന്ത്യയുടെ കുതിപ്പും: അറിയേണ്ടതെല്ലാം

ആധുനിക സാങ്കേതികവിദ്യയുടെ ‘തലച്ചോറാണ്’ മൈക്രോചിപ്പുകൾ അഥവാ സെമികണ്ടക്ടറുകൾ. സിലിക്കൺ പോലുള്ള അർദ്ധചാലക വസ്തുക്കളിൽ നിർമ്മിക്കുന്ന ഈ സൂക്ഷ്മ ചിപ്പുകൾ ഇന്നത്തെ സ്മാർട്ട്‌ഫോണുകൾ, കമ്പ്യൂട്ടറുകൾ, ഇലക്ട്രിക് വാഹനങ്ങൾ, മെഡിക്കൽ ഉപകരണങ്ങൾ, എഐ സൂപ്പർ കമ്പ്യൂട്ടറുകൾ എന്നിവയുടെയെല്ലാം പ്രവർത്തനത്തിന് ഒഴിച്ചുകൂടാനാവാത്ത ഘടകമാണ്.

ആർട്ടിഫിഷ്യൽ ഇന്റലിജൻസിന്റെ അതിവേഗ വളർച്ച പുതിയതും വിശ്വസനീയവുമായ ചിപ്പ്‌നിർമാണ കേന്ദ്രങ്ങൾക്ക് ആഗോളതലത്തിൽ വലിയ ആവശ്യം സൃഷ്ടിക്കുകയാണെന്ന് പ്രധാനമന്ത്രി നരേന്ദ്ര മോദി. ‘സെമികോൺ ഇന്ത്യ 2026’ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ആഗോള സെമികണ്ടക്ടർ വ്യവസായത്തിന് ആവശ്യമായ സമ്പൂർണ ആവാസവ്യവസ്ഥ ഒരുക്കുന്ന രാജ്യമായി ഇന്ത്യ അതിവേഗം മാറിവരികയാണെന്നും അദ്ദേഹം വ്യക്തമാക്കി.

എന്താണ് സെമികണ്ടക്ടറും ചിപ്പും? പ്രാധാന്യമെന്ത്?

ആധുനിക സാങ്കേതികവിദ്യയുടെ ‘തലച്ചോറാണ്’ മൈക്രോചിപ്പുകൾ അഥവാ സെമികണ്ടക്ടറുകൾ. സിലിക്കൺ പോലുള്ള അർദ്ധചാലക വസ്തുക്കളിൽ നിർമ്മിക്കുന്ന ഈ സൂക്ഷ്മ ചിപ്പുകൾ ഇന്നത്തെ സ്മാർട്ട്‌ഫോണുകൾ, കമ്പ്യൂട്ടറുകൾ, ഇലക്ട്രിക് വാഹനങ്ങൾ, മെഡിക്കൽ ഉപകരണങ്ങൾ, എഐ സൂപ്പർ കമ്പ്യൂട്ടറുകൾ എന്നിവയുടെയെല്ലാം പ്രവർത്തനത്തിന് ഒഴിച്ചുകൂടാനാവാത്ത ഘടകമാണ്. ലോകം മുഴുവൻ ചിപ്പ് നിർമ്മാണത്തിനായി ഏതാനും ചില രാജ്യങ്ങളെ മാത്രം ആശ്രയിക്കുന്നതിനാൽ, ഇതിന്റെ വിതരണ ശൃംഖലയിലുണ്ടാകുന്ന ചെറിയ തടസ്സങ്ങൾ പോലും ആഗോള സാമ്പത്തിക രംഗത്തെ ബാധിക്കാറുണ്ട്. ഈ പശ്ചാത്തലത്തിലാണ് ഇന്ത്യയുടെ സെമികണ്ടക്ടർ മിഷൻ ഏറെ പ്രധാന്യമർഹിക്കുന്നത്.

എഐ വളർച്ചയും സാങ്കേതിക മാറ്റങ്ങളും

കഴിഞ്ഞ രണ്ട് വർഷത്തിനിടെ ആഗോള സെമികണ്ടക്ടർ വിപണിയിൽ 20 ശതമാനത്തിലധികം വളർച്ച രേഖപ്പെടുത്തുന്നതിൽ എഐയുടെ ആവശ്യകത വലിയ പങ്കുവഹിച്ചിട്ടുണ്ടെന്ന് പ്രധാനമന്ത്രി ചൂണ്ടിക്കാണിച്ചതും ഈ പ്രാധാന്യത്തെ അടിവരയിടുന്നതാണ്. എഐയുടെ വരവോടെ ചിപ്പുകളുടെ ആവശ്യകത ചെറിയ ട്രാൻസിസ്റ്ററുകളുടെ നിർമാണത്തിൽ മാത്രം ഒതുങ്ങുന്നില്ല. ചിപ്പുകളുടെ സംയോജനം, ഡാറ്റയുടെ അതിവേഗ കൈമാറ്റം, തെർമൽ മാനേജ്മെന്റ്, വിശ്വസനീയ വൈദ്യുതി ലഭ്യത തുടങ്ങിയ ഘടകങ്ങൾക്കും കൂടുതൽ പ്രാധാന്യം ലഭിക്കുകയാണ്. പ്രോസസറുകളോട് മെമ്മറി കൂടുതൽ അടുപ്പിക്കുന്നതും ഒന്നിലധികം ചിപ്പുകളെ ഒരൊറ്റ സംവിധാനമായി പ്രവർത്തിക്കാൻ ബന്ധിപ്പിക്കുന്നതുമായ സാങ്കേതികവിദ്യകളിലേക്ക് വ്യവസായം മാറിക്കൊണ്ടിരിക്കുകയാണെന്നും അദ്ദേഹം വ്യക്തമാക്കി.

ഇന്ത്യയുടെ നിലവിലെ അവസ്ഥയും 13.5 ബില്യൺ ഡോളറിന്റെ രണ്ടാം ഘട്ടവും

ഇന്ത്യൻ സെമികണ്ടക്ടർ മേഖലയെ ശക്തിപ്പെടുത്തുന്നതിനായി 13.5 ബില്യൺ ഡോളറിന്റെ രണ്ടാം ഘട്ട സെമികണ്ടക്ടർ മിഷന് തുടക്കമിട്ടതായി മോദി പ്രഖ്യാപിച്ചു. നേരത്തെ നടപ്പാക്കിയ 8 ബില്യൺ ഡോളറിന്റെ ആദ്യഘട്ട പദ്ധതിയുടെ തുടർച്ചയായാണ് ഈ രണ്ടാം ഘട്ടം. നിലവിൽ രാജ്യത്ത് നിരവധി പദ്ധതികൾക്ക് അംഗീകാരം ലഭിച്ചുകഴിഞ്ഞു. ചിപ്പ് നിർമാണം മാത്രമല്ല, സെമികണ്ടക്ടർ വ്യവസായത്തിന് ആവശ്യമായ മുഴുവൻ വിതരണ ശൃംഖലയും ഇന്ത്യയിൽ വികസിപ്പിക്കാനാണ് സർക്കാർ ലക്ഷ്യമിടുന്നത്. തായ്‌വാൻ, ചൈന തുടങ്ങിയ രാജ്യങ്ങളെ മാത്രം ആശ്രയിക്കുന്ന ആഗോള സപ്ലൈ ചെയിൻ രീതിക്ക് ബദലായി ഇന്ത്യയെ പ്രധാന ആഗോള ഹബ്ബായി മാറ്റുകയാണ് ഇതിലൂടെ ലക്ഷ്യമിടുന്നത്.

ഉപകരണ നിർമാതാക്കളുടെയും വിതരണക്കാരുടെയും സാന്നിധ്യം

സെമികണ്ടക്ടർ നിർമാണത്തിന് ആവശ്യമായ ഉപകരണങ്ങൾ നിർമിക്കുന്ന കമ്പനികളെയും രാസവസ്തുക്കൾ, വാതകങ്ങൾ, മറ്റ് സാമഗ്രികൾ എന്നിവയുടെ വിതരണക്കാരെയും ഇന്ത്യയിലേക്ക് നിക്ഷേപത്തിനായി പ്രധാനമന്ത്രി ക്ഷണിച്ചു. ചിപ്പ് നിർമാണത്തോടൊപ്പം അതിന് ആവശ്യമായ അനുബന്ധ വ്യവസായങ്ങളും ഒരേസമയം വളരണമെന്നാണ് ഇന്ത്യ ആഗ്രഹിക്കുന്നത്. ആഭ്യന്തര വിതരണ ശൃംഖല ശക്തിപ്പെടുത്തുന്നതിയിലൂടെ ആഗോള സെമികണ്ടക്ടർ വ്യവസായത്തിൽ ഇന്ത്യയുടെ സ്ഥാനം കൂടുതൽ സുരക്ഷിതമാക്കാം.

ഗവേഷണവും സ്റ്റാർട്ടപ്പ് സഹകരണവും

വിദേശ രാജ്യങ്ങളിൽ ഗവേഷണം നടത്തുന്ന ഇന്ത്യൻ യുവാക്കളോട് രാജ്യത്തേക്ക് മടങ്ങിയെത്തി നൂതന സാങ്കേതികവിദ്യകളുടെ വികസനത്തിന് സംഭാവന നൽകാനും പ്രധാനമന്ത്രി ആഹ്വാനം ചെയ്തു. സെമികണ്ടക്ടർ മേഖലയിൽ ഗവേഷണ-വികസന പ്രവർത്തനങ്ങൾക്ക് വ്യവസായ മേഖല കൂടുതൽ നേതൃത്വം നൽകണം. എഐ അടിസ്ഥാന സൗകര്യങ്ങളുടെ വികസനത്തിൽ കൗണ്ട് സെമികണ്ടക്ടറുകൾ, സിലിക്കൺ ഫോട്ടോണിക്സ് തുടങ്ങിയ സാങ്കേതികവിദ്യകൾക്ക് ഇന്ത്യ പ്രത്യേക പരിഗണന നൽകും. അന്താരാഷ്ട്ര കമ്പനികൾക്ക് ഇന്ത്യൻ സ്റ്റാർട്ടപ്പുകൾ, ചിപ്പ് ഡിസൈൻ കമ്പനികൾ എന്നിവയുമായി സഹകരിക്കാൻ സാധിക്കുന്ന തരത്തിലുള്ള പരിഷ്കാരങ്ങളാണ് സർക്കാർ കൊണ്ടുവന്നിട്ടുള്ളത്. ഡിസൈൻ, ഗവേഷണം, സാങ്കേതികവിദ്യ, വിതരണ ശൃംഖല എന്നിവ ഉൾപ്പെടുന്ന സമഗ്രമായ ഒരു സെമികണ്ടക്ടർ ആവാസവ്യവസ്ഥ രാജ്യത്ത് വളർത്തിക്കൊണ്ടുവരികയാണ് സർക്കാരിന്റെ അന്തിമ ലക്ഷ്യമെന്ന് പ്രധാനമന്ത്രി വ്യക്തമാക്കി.

English Summary: Prime Minister Narendra Modi said the AI boom is creating demand for new and reliable semiconductor manufacturing hubs and positioned India as a destination for the global chip industry. At Semicon India 2026, he highlighted India’s $13.5 billion second phase of the Semiconductor Mission, domestic supply chains, advanced chip technologies and greater investment in R&D. Read more on INDIAWORD.