കേരളം പേര് മാറ്റം: കാരണങ്ങൾ അറിയാം

കേരളത്തിന്റെ ഔദ്യോഗിക പേര് ‘കേരളം’ എന്നാക്കി മാറ്റുന്നതിനുള്ള കേരള (അൾട്ടറേഷൻ ഓഫ് നെയിം) ബിൽ 2026 ലോക്‌സഭ പാസാക്കി. മലയാളത്തിൽ കാലങ്ങളായി ഉപയോഗിക്കുന്ന ‘കേരളം’ എന്ന പേര് ഭരണഘടനയിലും ഔദ്യോഗിക രേഖകളിലും കൊണ്ടുവരുന്നതിന്റെ ചരിത്രവും നിയമനടപടികളും പേരുമാറ്റത്തിന്റെ പ്രാധാന്യവും അറിയാം.

കേരളത്തിന്റെ ഔദ്യോഗിക പേര് ‘കേരളം’ എന്നാക്കി മാറ്റുന്നതിനുള്ള കേരള (അൾട്ടറേഷൻ ഓഫ് നെയിം) ബിൽ, ലോക്‌സഭ പാസാക്കിയിരിക്കുകയാണ്. കേരളം പേര് മാറ്റം വഴി മലയാളത്തിൽ കാലങ്ങളായി ഉപയോഗിച്ചുവരുന്ന ‘കേരളം’ എന്ന പേര് ഔദ്യോഗിക രേഖകളിലും ഭരണഘടനയിലും ഇംഗ്ലീഷിലും ഏകീകരിക്കണമെന്ന ആവശ്യമാണ് ഇതോടെ സഫലമാകുന്നത്. രാജ്യസഭ കൂടി ബിൽ പാസാക്കി രാഷ്ട്രപതിയുടെ അംഗീകാരം ലഭിക്കുന്നതോടെ കേരളത്തിന്റെ ഔദ്യോഗിക പേര് ‘കേരളം’ എന്നാകും.

സംസ്ഥാനത്തിന്റെ പേര് മാറ്റണമെന്നാവശ്യപ്പെട്ട് കേരള നിയമസഭ 2023 ഓഗസ്റ്റിലും 2024 ജൂണിലും ഐകകണ്ഠ്യേന പ്രമേയങ്ങൾ പാസാക്കിയിരുന്നു. ഭരണഘടനയുടെ ഒന്നാം പട്ടികയിലും ഇംഗ്ലീഷ് രേഖകളിലും നിലവിലുള്ള ‘Kerala’ എന്ന പേരിന് പകരം മലയാളത്തിൽ ഉപയോഗിക്കുന്ന ‘Keralam’ എന്നത് ഔദ്യോഗികമാക്കണമെന്നായിരുന്നു ആവശ്യം. 2026 ഫെബ്രുവരിയിൽ കേന്ദ്ര മന്ത്രിസഭ ഇതിന് അനുമതി നൽകിയതിനെത്തുടർന്നാണ് തുടർനടപടികൾ വേഗത്തിലായത്.

എന്തുകൊണ്ടാണ് കേരളത്തിന്റെ പേര് ‘കേരളം’ ആക്കുന്നത്?

ഇപ്പോൾ മലയാളത്തിൽ സംസ്ഥാനത്തെ ‘കേരളം’ എന്നാണ് വിളിക്കുന്നതെങ്കിലും ഇംഗ്ലീഷിലും ഭരണഘടനയിലും ഔദ്യോഗിക രേഖകളിലും ‘Kerala’ എന്ന പേരാണ് ഉപയോഗിക്കുന്നത്. ഭാഷാടിസ്ഥാനത്തിൽ രൂപീകരിക്കപ്പെട്ട ഒരു സംസ്ഥാനത്തിന്റെ ഔദ്യോഗിക പേര് അതിന്റെ ഭാഷയിൽ ഉപയോഗിക്കുന്ന രൂപവുമായി യോജിക്കണമെന്ന വാദമാണ് കേരളം പേര് മാറ്റം ആവശ്യപ്പെടുന്നവർ പ്രധാനമായും മുന്നോട്ടുവെയ്ക്കുന്നത്.

ഭരണഘടനയിലെ അനുച്ഛേദം 3 പ്രകാരം സംസ്ഥാനത്തിന്റെ പേര് മാറ്റുന്നതിനുള്ള നടപടിയാണ് സ്വീകരിച്ചത്. 2024 ജൂണിൽ കേരള നിയമസഭ വീണ്ടും പ്രമേയം പാസാക്കി കേന്ദ്രത്തോട് ആവശ്യപ്പെട്ടതും ഇതിന്റെ ഭാഗമായിരുന്നു. അതുകൊണ്ടുതന്നെ ഇതൊരു പുതിയ പേര് കണ്ടെത്താനുള്ള ശ്രമമല്ല; മലയാളത്തിൽ ദീർഘകാലമായി നിലനിൽക്കുന്ന ‘കേരളം’ എന്ന പേരിന് ഭരണഘടനാപരമായ ഔദ്യോഗിക അംഗീകാരം നൽകാനുള്ള നടപടിയാണ്.

‘കേരള’, ‘കേരളം’ എന്നീ പേരുകൾ എവിടെ നിന്നെത്തി?

കേരളം എന്ന പേരിന്റെ ചരിത്രം നിരവധി വാദങ്ങളും ചരിത്രപരമായ പരാമർശങ്ങളും ഉൾക്കൊള്ളുന്നതാണ്. ബിസി 257ൽ അശോക ചക്രവർത്തിയുടെ രണ്ടാം ശിലാഫലകത്തിൽ കാണുന്ന ‘കേതലപുത്ര’ എന്ന പരാമർശം ഈ പേരിന്റെ ആദ്യകാല രൂപങ്ങളിലൊന്നായി കണക്കാക്കപ്പെടുന്നു. ദക്ഷിണേന്ത്യയിലെ പ്രധാന രാജ്യങ്ങളിലൊന്നായിരുന്ന ചേര രാജവംശത്തെയാണ് ഇത് സൂചിപ്പിക്കുന്നതെന്നാണ് ചരിത്രകാരന്മാരുടെ വിലയിരുത്തൽ.

‘കേരള’ എന്ന വാക്കിന്റെ ഉത്ഭവത്തെക്കുറിച്ച് വ്യത്യസ്ത അഭിപ്രായങ്ങളുണ്ട്. സംസ്കൃതത്തിലെ ‘കേരള’ എന്ന രൂപം ഈ പ്രദേശവുമായി ബന്ധപ്പെട്ട പുരാതന നാമങ്ങളിൽ നിന്നാണ് ഉണ്ടായതെന്ന വാദമുണ്ട്. പ്രശസ്ത ജർമ്മൻ മിഷനറിയും ഭാഷാശാസ്ത്രജ്ഞനുമായ ഹെർമൻ ഗുണ്ടർട്ട് കന്നഡയിലെ ‘കേര’യും ‘ചേര’യും തമ്മിലുള്ള ബന്ധവും ചൂണ്ടിക്കാണിക്കുന്നു. ഗോകർണം മുതൽ കന്യാകുമാരി വരെയുള്ള പ്രദേശത്തെ സൂചിപ്പിച്ചിരുന്ന പഴയ പ്രയോഗങ്ങളുമായി ഈ പേരിന് ബന്ധമുണ്ടെന്ന അഭിപ്രായവുമുണ്ട്. മറ്റൊരു വാദമനുസരിച്ച് പഴയ തമിഴിലെ ‘ചേർ’, ‘ആലം’ എന്നീ പദങ്ങളിൽ നിന്നാണ് കേരളം എന്ന പേര് രൂപപ്പെട്ടത്. അതിനാൽ കേരളം പേര് മാറ്റം ചർച്ച ചെയ്യുമ്പോൾ, കേരള നാമത്തിന്റെ ഉത്ഭവം സംബന്ധിച്ച് ഇന്നും ഏകാഭിപ്രായമില്ലെന്നതും ശ്രദ്ധേയമാണ്.

‘കേരളം’ എന്ന ഭാഷാപരമായ സ്വത്വം

കേരളത്തിന്റെ പേരുമായി ബന്ധപ്പെട്ട ഭാഷാപരമായ അവകാശവാദം പുതിയതല്ല. ആറോ ഏഴോ നൂറ്റാണ്ടുകൾക്ക് മുമ്പ് രചിക്കപ്പെട്ടതായി കരുതപ്പെടുന്ന ‘ലീലാതിലകം’ എന്ന സംസ്കൃത ലക്ഷണഗ്രന്ഥത്തിലും മലയാളത്തിന്റെ ഭാഷാപരമായ സ്വത്വത്തെക്കുറിച്ചുള്ള ചർച്ചകൾ കാണാം. ഗ്രന്ഥത്തിൽ ‘കേരള ഭാഷ’യെ പാണ്ഡ്യ, ചോള ഭാഷകളോടൊപ്പം വിശാലമായ ദ്രാവിഡ ഭാഷാവിഭാഗത്തിൽ ഉൾപ്പെടുത്തുന്ന വാദം മുന്നോട്ടുവയ്ക്കുന്നുണ്ട്. അതേസമയം ആന്ധ്ര, കർണാടക ഭാഷകളെ അതിൽനിന്ന് വേർതിരിച്ചാണ് അവതരിപ്പിക്കുന്നത്. തമിഴ് സാഹിത്യത്തിന് സമാനമായ നിലയിൽ സ്വന്തം ഭാഷയെ പ്രതിഷ്ഠിക്കാനുള്ള കേരളത്തിലെ ആദ്യകാല ഭാഷാപരമായ സ്വത്വപ്രഖ്യാപനങ്ങളിലൊന്നായി ഇതിനെ കാണാം. അതുകൊണ്ടുതന്നെ ഇന്നത്തെ കേരളം എന്ന പേര് മാറ്റം കേവലം ഭരണപരമായ നടപടി മാത്രമല്ലെന്നും, മലയാളത്തിന്റെ ഭാഷാപരമായ സ്വത്വവുമായി ബന്ധപ്പെട്ട പ്രതീകാത്മക നീക്കമാണെന്നും ഭാഷാ വിദ​ഗ്ധരും ചരിത്രകാരൻമാരും വിലയിരുത്തുന്നു.

ആധുനിക കേരളം രൂപം കൊണ്ടത് എങ്ങനെ?

ഭാഷാടിസ്ഥാനത്തിൽ സംസ്ഥാന പുനഃസംഘടന നടന്നതിന്റെ ഭാഗമായാണ് ആധുനിക കേരള സംസ്ഥാനം രൂപംകൊണ്ടത്. തിരുവിതാംകൂർ, കൊച്ചി നാട്ടുരാജ്യങ്ങളും മലബാർ പ്രദേശവും ഉൾപ്പെടുത്തി 1956 നവംബർ 1നാണ് കേരളം രൂപീകരിച്ചത്. സംസ്ഥാന പുനഃസംഘടനാ കമ്മീഷനായ ഫസൽ അലി കമ്മീഷന്റെ ശുപാർശകളായിരുന്നു ഇതിന്റെ അടിസ്ഥാനം. മലയാളം സംസാരിക്കുന്ന ജനവിഭാഗങ്ങളെ ഒരുമിപ്പിച്ചാണ് പുതിയ സംസ്ഥാനം രൂപീകരിച്ചത്. മലബാർ പ്രദേശവും കാസർഗോഡ് താലൂക്കും കേരളത്തിൽ ഉൾപ്പെട്ടപ്പോൾ തിരുവിതാംകൂറിന്റെ തെക്കൻ ഭാഗത്തെ ചില താലൂക്കുകൾ തമിഴ്നാടിന്റെ ഭാഗമായി. കേരളം പേര് മാറ്റം എന്ന വിഷയത്തിന്റെ ചരിത്രപരമായ പശ്ചാത്തലവും ഇതുമായി ബന്ധപ്പെട്ടാണ്.

സംസ്ഥാനം രൂപീകരിക്കപ്പെട്ടതുമുതൽ മലയാളത്തിൽ ‘കേരളം’ എന്ന പേരാണ് സാധാരണ ഉപയോഗിച്ചിരുന്നത്. എന്നാൽ ഭരണഘടനയിലും ഇംഗ്ലീഷ് ഔദ്യോഗിക രേഖകളിലും ‘Kerala’ എന്ന രൂപം തുടർന്നു. ഇപ്പോഴത്തെ കേരളം പേര് മാറ്റം സംബന്ധിച്ച കേരള (അൾട്ടറേഷൻ ഓഫ് നെയിം) ബിൽ 2026 ഈ വ്യത്യാസം ഇല്ലാതാക്കാനാണ് ലക്ഷ്യമിടുന്നത്.

ഒരു സംസ്ഥാനത്തിന്റെ പേര് എങ്ങനെ മാറ്റും?

ഇന്ത്യൻ ഭരണഘടനയുടെ അനുച്ഛേദം 3 പ്രകാരം സംസ്ഥാനത്തിന്റെ പേര്, അതിർത്തി, വിസ്തീർണം എന്നിവയിൽ മാറ്റം വരുത്താനുള്ള അധികാരം പാർലമെന്റിനാണ്. എന്നാൽ ഇത്തരമൊരു ബിൽ പാർലമെന്റിൽ അവതരിപ്പിക്കുന്നതിന് മുമ്പ് രാഷ്ട്രപതിയുടെ ശുപാർശ ആവശ്യമാണ്. കേരളം പേര് മാറ്റം സംബന്ധിച്ച കാര്യത്തിൽ, പേര് മാറ്റം ബാധിക്കുന്ന സംസ്ഥാനത്തിന്റെ നിയമസഭയുടെ അഭിപ്രായവും രാഷ്ട്രപതി തേടും. എന്നാൽ നിയമസഭയുടെ അഭിപ്രായം അംഗീകരിക്കാൻ പാർലമെന്റ് ഭരണഘടനാപരമായി ബാധ്യസ്ഥമല്ല.

കേരളത്തിന്റെ കാര്യത്തിൽ സംസ്ഥാന നിയമസഭ തന്നെ കേരളം പേര് മാറ്റം പിന്തുണച്ച് രണ്ട് പ്രമേയങ്ങൾ പാസാക്കിയിരുന്നു. തുടർന്ന് കേന്ദ്ര മന്ത്രിസഭയുടെ അനുമതിക്ക് ശേഷം ബിൽ പാർലമെന്റിലെത്തി. ലോക്‌സഭ ബിൽ പാസാക്കിയ സാഹചര്യത്തിൽ ഇനി രാജ്യസഭയുടെ അംഗീകാരവും രാഷ്ട്രപതിയുടെ അനുമതിയുമാണ് ആവശ്യമായ പ്രധാന ഘട്ടങ്ങൾ. ഇവ പൂർത്തിയായാൽ കേരളത്തിന്റെ ഔദ്യോഗിക പേര് ‘കേരളം’ എന്നാകും.

പേര് മാറിയാൽ എന്തൊക്കെ മാറ്റേണ്ടിവരും?

‘കേരളം’ എന്ന പേര് ഔദ്യോഗികമാകുന്നത് ഭരണഘടനാപരമായ ഒരു തിരുത്തൽ മാത്രമായി ഒതുങ്ങുമോ എന്നതും ചർച്ച ചെയ്യപ്പെടുന്നുണ്ട്. സംസ്ഥാന സർക്കാരിന്റെ വിവിധ രേഖകൾ, സ്ഥാപനങ്ങളുടെ പേരുകൾ, ഔദ്യോഗിക ആശയവിനിമയങ്ങൾ, വെബ്സൈറ്റുകൾ, ബോർഡുകൾ, രേഖകൾ തുടങ്ങിയവയിൽ ആവശ്യമായ മാറ്റങ്ങൾ വരുത്തേണ്ടിവരാം.

ഇതോടെ സർക്കാർ സംവിധാനങ്ങൾക്ക് അധിക ചെലവും ഉണ്ടാകാനുള്ള സാധ്യതയുണ്ട്. എന്നാൽ ഏതെല്ലാം രേഖകൾക്കും സ്ഥാപനങ്ങൾക്കും പേരുമാറ്റം ആവശ്യമാണ് എന്നത് തുടർന്നുള്ള ഭരണപരമായ തീരുമാനങ്ങളെ ആശ്രയിച്ചിരിക്കും. സംസ്ഥാനത്തിന്റെ ഭരണഘടനാപരമായ പേര് ഔദ്യോഗികമായി മാറുന്നതും സംസ്ഥാനത്തെ എല്ലാ സ്ഥാപനങ്ങളുടെയും പേരുകൾ നിർബന്ധമായും മാറുന്നതും ഒരേ കാര്യമല്ല.

‘കേരള’ത്തിൽ നിന്ന് ‘കേരളം’ എന്നതിലേക്കുള്ള മാറ്റം എന്താണ് പറയുന്നത്?

ഒരു വശത്ത്, മലയാളത്തിൽ ഉപയോഗിക്കുന്ന പേരിന് ഔദ്യോഗിക അംഗീകാരം ലഭിക്കുന്നതിലൂടെ ഭാഷാപരമായ സ്വത്വം കൂടുതൽ ശക്തമാകുമെന്നാണ് പിന്തുണക്കുന്നവരുടെ വാദം. മറുവശത്ത്, ‘കേരള’ എന്ന രൂപം സംസ്കൃതത്തിലും ചരിത്രരേഖകളിലും നിലനിന്നിരുന്നുവെന്നതിനാൽ ഇത് വെറും ഇംഗ്ലീഷ് വൽക്കരിച്ച പേരിനെ തിരുത്തുന്നതാണോ എന്ന ചർച്ചയും തുടരാം. പേരിന്റെ യഥാർഥ ഉത്ഭവം സംബന്ധിച്ച തർക്കങ്ങൾ ചരിത്രത്തിലും ഭാഷാശാസ്ത്രത്തിലും തുടരാൻ സാധ്യതയുണ്ട്. പേര് മാറ്റം എന്ന രാഷ്ട്രീയ തീരുമാനത്തിന്റെ അടിസ്ഥാനത്തിൽ കേരളം ഇപ്പോൾ മുന്നോട്ടുപോകുന്നത് മലയാളത്തിൽ കാലങ്ങളായി ഉപയോഗിക്കുന്ന ‘കേരളം’ എന്ന രൂപത്തിന് ഔദ്യോഗിക പദവി നൽകുക എന്നതിനായാണ്.

അങ്ങനെ നോക്കുമ്പോൾ, ഒരു സംസ്ഥാനത്തിന്റെ പേരിൽ ഒരു ‘മ്’ കൂടി ചേർക്കുന്നതുപോലെ ചെറുതായി തോന്നുന്ന മാറ്റത്തിന് പിന്നിൽ ഭാഷയും ചരിത്രവും രാഷ്ട്രീയവും ഭരണഘടനയും ഉൾപ്പെടുന്ന വലിയ പശ്ചാത്തലമുണ്ട്. ഔദ്യോഗിക രേഖകളിൽ ‘കേരള’ എന്നതിൽ നിന്ന് ‘കേരളം’ എന്നതിലേക്കുള്ള ഈ ‘മ്’ മാറ്റത്തിന് എത്രത്തോളം പ്രായോഗികവും പ്രതീകാത്മകവുമായ പ്രാധാന്യമുണ്ട് എന്ന ചോദ്യമാണ് കേരളം പേര് മാറ്റം അവശേഷിപ്പിക്കുന്നത്.