കേരളത്തിന്റെ കുടിയേറ്റ സമ്പദ്‌വ്യവസ്ഥയിലെ മാറ്റം

പരമ്പരാഗത ഗൾഫ് മോഹങ്ങളിൽ നിന്ന് മാറി യൂറോപ്പിലേക്കും പടിഞ്ഞാറൻ രാജ്യങ്ങളിലേക്കുമുള്ള കുടിയേറ്റവും, വിദ്യാർത്ഥി കേന്ദ്രീകൃതമായ പുതിയ പാതകളും കേരളത്തിന്റെ പ്രവാസി സമ്പദ്‌വ്യവസ്ഥയെ പുനർനിർണയിക്കുന്നു. ഇത് കേവലം താൽക്കാലികമായ മാറ്റമല്ല, മറിച്ച് കേരളത്തിന്റെ സമ്പദ്‌വ്യവസ്ഥയുടെ അടിത്തറയെത്തന്നെ മാറ്റിയെഴുതുന്ന ഘടനാപരമായ പരിവർത്തനം കൂടിയാണ്.

കേരളത്തിന്റെ സാമ്പത്തിക-സാമൂഹിക ഘടനയെ പതിറ്റാണ്ടുകളായി താങ്ങിനിർത്തുന്ന സുപ്രധാന ഘടകമാണ് ഗൾഫ് കുടിയേറ്റം. എന്നാൽ കഴിഞ്ഞ പത്ത് വർഷങ്ങൾക്കിടയിൽ, കേരളത്തിന്റെ കുടിയേറ്റ മാതൃകയിൽ വളരെ ശാന്തവും ആഴത്തിലുള്ളതുമായ പരിവർത്തനം സംഭവിച്ചുകൊണ്ടിരിക്കുകയാണ്. പരമ്പരാഗത ഗൾഫ് മോഹങ്ങളിൽ നിന്ന് മാറി യൂറോപ്പിലേക്കും പടിഞ്ഞാറൻ രാജ്യങ്ങളിലേക്കുമുള്ള കുടിയേറ്റവും, വിദ്യാർത്ഥി കേന്ദ്രീകൃതമായ പുതിയ പാതകളും കേരളത്തിന്റെ പ്രവാസി സമ്പദ്‌വ്യവസ്ഥയെ പുനർനിർണയിക്കുന്നു. ഇത് കേവലം താൽക്കാലികമായ മാറ്റമല്ല, മറിച്ച് കേരളത്തിന്റെ സമ്പദ്‌വ്യവസ്ഥയുടെ അടിത്തറയെത്തന്നെ മാറ്റിയെഴുതുന്ന ഘടനാപരമായ പരിവർത്തനം കൂടിയാണ്.

കഴിഞ്ഞ വർഷം റിസർവ് ബാങ്ക് ഓഫ് ഇന്ത്യ (RBI) പുറത്തിറക്കിയ ബുള്ളറ്റിനിലെ പഠനങ്ങൾ ഈ മാറ്റത്തെ കൃത്യമായി അടയാളപ്പെടുത്തുന്നുണ്ട്. ഇന്ത്യയിലേക്ക് എത്തുന്ന പ്രവാസിപ്പണത്തിന്റെ ഉറവിടങ്ങളിൽ വലിയ മാറ്റമുണ്ടായതായി ആർബിഐ കണക്കുകൾ ചൂണ്ടിക്കാണിക്കുന്നു. ജിസിസി (GCC) രാജ്യങ്ങളിൽ നിന്നുള്ള പണത്തിന്റെ വരവിൽ ഇടിവുണ്ടാകുമ്പോൾ യുഎസ്, യുകെ, കാനഡ, ഓസ്‌ട്രേലിയ തുടങ്ങിയ പടിഞ്ഞാറൻ രാജ്യങ്ങളിൽ നിന്നുള്ള വിഹിതം ഉയരുകയാണെന്ന് കണക്കുകൾ വ്യക്തമാക്കുന്നു. കേരള മൈഗ്രേഷൻ സർവേ (KMS 2023) പ്രകാരം കേരളത്തിൽ നിന്നുള്ള ആകെ കുടിയേറ്റക്കാരിൽ ഗൾഫ് രാജ്യങ്ങളിലേക്ക് പോയവരുടെ എണ്ണം 2018ൽ 89.2 ശതമാനമായിരുന്നു. എന്നാൽ 2023ൽ ഇത് 80.5 ശതമാനമായി കുറഞ്ഞു. അതേസമയം, പടിഞ്ഞാറൻ രാജ്യങ്ങളിലേക്ക് ഉന്നതവിദ്യാഭ്യാസത്തിനും വിദഗ്ധ തൊഴിലുകൾക്കുമായി മലയാളി യുവാക്കൾ കൂട്ടത്തോടെ യാത്രതിരിക്കാനും ആരംഭിച്ചു.

രൂപയുടെ മൂല്യത്തകർച്ചയും റെക്കോർഡ് റെമിറ്റൻസും

കേരളത്തിലേക്ക് എത്തുന്ന പണത്തിന്റെ അളവ് വലിയ തോതിൽ വർധിച്ചതിന് പിന്നിലെ പ്രധാന സാമ്പത്തിക ഘടകം യുഎസ് ഡോളറിനെതിരേ ഇന്ത്യൻ രൂപയ്ക്കുണ്ടായ മൂല്യത്തകർച്ചയാണ്. 2021ൽ ഡോളറിന് ₹74.34 ആയിരുന്ന രൂപയുടെ മൂല്യം 2025ന്റെ തുടക്കത്തിൽ ₹86.53 എന്ന നിരക്കിലേക്കെത്തി. ഈ 16.4 ശതമാനം ഇടിവ് വിദേശത്ത് ജോലി ചെയ്യുന്ന മലയാളികൾക്ക് വലിയ സാമ്പത്തിക നേട്ടമായി മാറി. ഡോളറുമായി മൂല്യം നിശ്ചയിക്കപ്പെട്ടിട്ടുള്ള ഗൾഫ് കറൻസികൾക്ക് നാട്ടിൽ കൂടുതൽ വിനിമയ മൂല്യം ലഭിച്ചതോടെ പ്രവാസികൾ വലിയ തോതിൽ പണം നാട്ടിലേക്ക് അയക്കാൻ ഇത് കാരണമായി.

കെഎംഎസ് ഡാറ്റ പ്രകാരം കേരളത്തിലേക്കുള്ള ആകെ പ്രവാസിപ്പണം 2018ലെ ₹85,092 കോടിയിൽ നിന്ന് 154.9 ശതമാനം വർധിച്ച് 2023ൽ ₹2,16,893 കോടിയായി കുതിച്ചുയർന്നു. ഒരു പ്രവാസി കുടുംബത്തിന് ലഭിക്കുന്ന ശരാശരി തുക ₹96,185ൽ നിന്ന് ₹2,23,729 ആയി ഇരട്ടിയിലധികം വർധിക്കുകയും ചെയ്തു. ആർബിഐ റിപ്പോർട്ട് അനുസരിച്ച് ഇന്ത്യയുടെ ആകെ റെമിറ്റൻസ് $118.7 ബില്യൺ ഡോളറായി ഉയർന്നപ്പോഴും അതിൽ ഏറ്റവും ഉയർന്ന വിഹിതം നേടുന്ന സംസ്ഥാനങ്ങളിലൊന്നായി കേരളം തുടർന്നു.

വിദ്യാഭ്യാസ കുടിയേറ്റവും സ്ത്രീ പങ്കാളിത്തവും

കേരളത്തിലെ പുതിയ കുടിയേറ്റത്തിന്റെ ഏറ്റവും വലിയ സവിശേഷത വിദ്യാർത്ഥി കുടിയേറ്റത്തിലുണ്ടായ (Student Emigration) വർധനവാണ്. 2018ൽ 1.3 ലക്ഷമായിരുന്ന മലയാളി കുടിയേറ്റ വിദ്യാർത്ഥികളുടെ എണ്ണം 2023 ആയപ്പോഴേക്കും 2.5 ലക്ഷമായി ഇരട്ടിച്ചു. ഇത് സംസ്ഥാനത്തുനിന്നുള്ള ആകെ കുടിയേറ്റത്തിന്റെ 11.3 ശതമാനമാണ്. പലരും 17ആം വയസ്സിൽ തന്നെ വിദേശത്തേക്ക് തിരിക്കുകയും അവിടെത്തന്നെ സ്ഥിരതാമസമാക്കുകയും ചെയ്യുന്നു. കുടിയേറ്റക്കാരുടെ വിദ്യാഭ്യാസ യോഗ്യതയിലും വലിയ മാറ്റമുണ്ട്. വിദേശത്തേക്ക് പോകുന്ന സ്ത്രീകളിൽ 71.5 ശതമാനം പേരും ബിരുദധാരികളാണ്, അതേസമയം പുരുഷൻമാരിൽ ഇത് ഇത് 34.7% മാത്രമാണ്. ഈ സ്ത്രീകളിൽ 40.5 ശതമാനം പേരും പടിഞ്ഞാറൻ രാജ്യങ്ങളാണ് തിരഞ്ഞെടുക്കുന്നത് എന്നത് സ്ത്രീകളുടെ സാമൂഹിക മുൻഗണനകളിലെയും സാമ്പത്തിക സ്വാതന്ത്ര്യത്തിലെയും മാറ്റം വ്യക്തമാക്കുന്നു.

ഗൾഫ് കുടിയേറ്റത്തിലെ പുതിയ പ്രവണതകൾ

എന്നാൽ ഈ സാമ്പത്തിക വളർച്ചയോടൊപ്പം ചില ആശങ്കാജനകമായ വൈരുധ്യങ്ങളും നിലനിൽക്കുന്നുണ്ട്. കേരളത്തിന്റെ ആകെ ആഭ്യന്തര ഉത്പാദനത്തിന്റെ (NSDP) 23.2 ശതമാനത്തോളം പ്രവാസിപ്പണമാണ്. എന്നാൽ, സംസ്ഥാനത്ത് പ്രവാസിപ്പണം കൈപ്പറ്റുന്ന കുടുംബങ്ങളുടെ എണ്ണം 16 ശതമാനത്തിൽ നിന്ന് 12 ശതമാനമായി ചുരുങ്ങിയതായി കണക്കുകൾ വ്യക്തമാക്കുന്നു. പണം അയക്കുന്നവരുടെ വരുമാനം വർധിച്ചെങ്കിലും, കേരളത്തിന്റെ കുടിയേറ്റ മാതൃകയിലെ സാമ്പത്തിക നേട്ടങ്ങൾ കുറച്ചു കുടുംബങ്ങളിലേക്ക് മാത്രമായി ചുരുങ്ങിയിരിക്കുന്നു എന്നാണ് ഇത് സൂചിപ്പിക്കുന്നത്. പ്രവാസിപ്പണം വിനിയോഗിക്കുന്ന രീതിയിലും മാറ്റമുണ്ട്. ലഭിക്കുന്ന പണത്തിന്റെ 15.8% വീട്/കട നിർമാണത്തിനും, 14% വായ്പ തിരിച്ചടവിനും, 10% വിദ്യാഭ്യാസത്തിനുമായാണ് മാറ്റിവെക്കുന്നത്.

കൂടാതെ, ചരിത്രത്തിലാദ്യമായി കേരളം വിദേശങ്ങളിലേക്ക് തിരികെ അയക്കുന്ന പണത്തിന്റെ (Outward Remittances) അളവിലും വലിയ വർധനവ് രേഖപ്പെടുത്തി—ഏകദേശം ₹43,378 കോടി രൂപ. ഇത് നാട്ടിലേക്ക് എത്തുന്ന പണത്തിന്റെ 20 ശതമാനത്തോളം വരും. വിദേശത്ത് പഠിക്കുന്ന കുട്ടികളുടെ ട്യൂഷൻ ഫീസിനായും ജീവിതച്ചെലവിനായും നാട്ടിൽ നിന്നും പണമയക്കുന്ന പുതിയ പ്രവണതയാണ് ഇത് കാണിക്കുന്നത്.

മാറ്റത്തിന് പിന്നിലെ ആഗോള ഘടകങ്ങൾ

കേരളത്തിലെ ഈ കുടിയേറ്റ പരിവർത്തനം ശക്തമായ ചില ആഗോള ചലനങ്ങളുടെ ഫലമാണ്. ജിസിസി രാജ്യങ്ങളിലെ സൗദൈസേഷൻ, എമിറേറ്റൈസേഷൻ തുടങ്ങിയ സ്വദേശിവൽക്കരണ നയങ്ങളും കുറഞ്ഞ ശമ്പളവും സാധാരണ തൊഴിലാളികൾക്ക് പ്രതിസന്ധിയുണ്ടാക്കി. യുഎഇയിൽ നിന്നും മറ്റും വിസ കാലാവധി കഴിഞ്ഞും ജോലി നഷ്ടപ്പെട്ടും 1.8 മില്യൺ പ്രവാസികളാണ് കേരളത്തിലേക്ക് മടങ്ങിയെത്തിയത്. അതേസമയം, പടിഞ്ഞാറൻ രാജ്യങ്ങളിലെ ലിബറൽ വിസാ നയങ്ങൾ അഭ്യസ്തവിദ്യരായ മലയാളി യുവാക്കൾക്ക് പുതിയ വാതിലുകൾ തുറന്നുനൽകി. ഡിജിറ്റൽ ഫിൻടെക് പ്ലാറ്റ്‌ഫോമുകളുടെ വളർച്ച പണമിടപാടുകൾ കൂടുതൽ വേഗത്തിലാക്കുകയും ചെയ്തു.

മടങ്ങിവരുന്ന പ്രവാസികളെയും വിദ്യാർത്ഥി കുടിയേറ്റത്തെയും കുറിച്ചുള്ള കൃത്യമായ സ്റ്റേറ്റ്-വൈസ് ഡാറ്റാ സംവിധാനങ്ങളുടെ അഭാവം ഈ മാറ്റങ്ങളെ ഉൾക്കൊണ്ടുള്ള മികച്ച നയരൂപീകരണത്തിന് ഇപ്പോഴും സർക്കാരിന് തടസ്സമാകുന്നുണ്ട്. കേന്ദ്രത്തിന്റെ ‘സ്വദേശ്’ (SWADES) പദ്ധതി, ‘അസീം’ (ASEEM) പോർട്ടൽ പോലുള്ള സംവിധാനങ്ങൾക്ക് ഈ മാറ്റം പൂർണമായി ഉൾക്കൊള്ളാൻ കഴിഞ്ഞിട്ടില്ല.

ഗൾഫ് കുടിയേറ്റം: രണ്ടാം ഘട്ടം, ഗുണപരമായ മാറ്റം?

കേരളത്തിന്റെ കുടിയേറ്റ ചരിത്രത്തിലെ രണ്ടാം ഘട്ടം പല പരിധിയിലും ഗുണപരമായ വലിയ മാറ്റങ്ങളെയാണ് അടയാളപ്പെടുത്തുന്നത്. സാധാരണ ഗൾഫ് തൊഴിലാളികളിൽ നിന്നും വിഭിന്നമായി ഉന്നത വിദ്യാഭ്യാസമുള്ള പ്രൊഫഷണലുകളിലേക്കും വിദ്യാർത്ഥികളിലേക്കും മാറിയ ആഗോള കുടിയേറ്റം സംസ്ഥാനത്തിന്റെ വികസന കാഴ്ചപ്പാടുകളെ പുതിയ തലത്തിലേക്ക് ഉയർത്തുന്നതായി കാണാം. പടിഞ്ഞാറൻ രാജ്യങ്ങളിലെ തീവ്ര വലതുപക്ഷ രാഷ്ട്രീയ മാറ്റങ്ങൾ ഭാവിയിൽ ഈ ഒഴുക്കിന് ചില വെല്ലുവിളികൾ ഉയർത്തിയേക്കാമെന്ന ആശങ്കകൾ നിലനിൽക്കുന്നുണ്ടെങ്കിലും, അത് കേരളത്തിന്റെ മുന്നേറ്റത്തെ പൂർണമായും തടസ്സപ്പെടുത്തുന്ന തരത്തിലായിരിക്കില്ല എന്നാണ് സാമൂഹിക നിരീക്ഷകർ വിലയിരുത്തുന്നത്. കാരണം, സമകാലിക മലയാളി കുടിയേറ്റം കേവലം ഉപജീവനത്തിനായുള്ള നെട്ടോട്ടമല്ല, മറിച്ച് ആഗോള വിജ്ഞാന-സാമ്പത്തിക വിപണിയിലെ പുതിയ സാധ്യതകൾ കീഴടക്കാനുള്ള ബോധപൂർവവും ഒരുങ്ങിയുമുള്ള യാത്രകളാണ്. അതുകൊണ്ടുതന്നെ, ഈ ആഗോള ഇടപെടലുകൾ ദീർഘകാലാടിസ്ഥാനത്തിൽ കേരളത്തിന് പുതിയ വികസന മാതൃകകളും നവീകരണത്തിനുള്ള വലിയ അവസരങ്ങളും സമ്മാനിക്കുമെന്ന കാര്യത്തിൽ സംശയമില്ല.