മെറ്റ കൗമാര സുരക്ഷാ നിയന്ത്രണങ്ങൾ ശക്തമാക്കും; ഇൻസ്റ്റാഗ്രാം, ഫേസ്ബുക്ക് മാറ്റങ്ങൾ അറിയാം

ഫേസ്ബുക്കിലും ഇൻസ്റ്റാഗ്രാമിലും കൗമാര സുരക്ഷാ നിയന്ത്രണങ്ങൾ ശക്തമാക്കുന്നതിന്റെ ഭാഗമായി കൗമാരക്കാരുടെ രാത്രികാല ഉപയോഗത്തിന് നിയന്ത്രണം, പ്രതിദിന സ്ക്രീൻ ടൈം പരിധി, പ്രായപരിശോധന ഉൾപ്പെടെ വൻ മാറ്റങ്ങൾക്ക് നിർദേശം. പ്രാദേശിക സമയം രാത്രി 12 മണി മുതൽ പുലർച്ചെ 6 മണി വരെ ഫേസ്ബുക്കും ഇൻസ്റ്റാഗ്രാമും ഉപയോഗിക്കുന്നതിൽ നിന്ന് കൗമാരക്കാരുടെ അക്കൗണ്ടുകൾ സ്വയം ബ്ലോക്ക് ചെയ്യപ്പെടും. മെറ്റയുടെ പ്ലാറ്റ്‌ഫോമുകൾ കൗമാരക്കാർ എങ്ങനെ ഉപയോഗിക്കുന്നു എന്നതിൽ പുതിയ പരിമിതികൾ നിർദ്ദിഷ്ട കരാർ കൊണ്ടുവരും.

യുവ ഉപയോക്താക്കളെ പ്ലാറ്റ്‌ഫോമുകളിൽ കൂടുതൽ സമയം ചെലവഴിക്കാൻ പ്രേരിപ്പിക്കുന്ന രീതിയിൽ ഫേസ്ബുക്കും ഇൻസ്റ്റാഗ്രാമും മനഃപൂർവം രൂപകൽപ്പന ചെയ്തുവെന്നാരോപിച്ചുള്ള കേസിൽ ഒത്തുതീർപ്പിലെത്തുന്നതിന്റെ ഭാഗമായി, യു.എസ് സംസ്ഥാനങ്ങൾക്ക് 16.7 ബില്യൺ ഡോളർ വരെ നൽകാനും കൗമാര ഉപയോക്താക്കൾക്കായി നിരവധി പുതിയ നിയന്ത്രണങ്ങൾ കൊണ്ടുവരാനും മെറ്റ സമ്മതിച്ചിരിക്കുകയാണ്. മെറ്റ കൗമാര സുരക്ഷാ നിയന്ത്രണങ്ങൾ ശക്തമാക്കുന്നതിന്റെ ഭാഗമായി ഫേസ്ബുക്കിലും ഇൻസ്റ്റാഗ്രാമിലും രാത്രികാല ഉപയോഗ നിയന്ത്രണം, പ്രതിദിന സ്ക്രീൻ ടൈം പരിധി, നോട്ടിഫിക്കേഷൻ നിയന്ത്രണം, പ്രായപരിശോധന എന്നിവ ഉൾപ്പെടെയുള്ള ശക്തമായ മാറ്റങ്ങളാണ് നിർദ്ദിഷ്ട കരാറിലുള്ളത്.

കാലിഫോർണിയയിലെ ഫെഡറൽ കോടതിയിൽ ഫയൽ ചെയ്ത നിർദ്ദിഷ്ട കരാർ പ്രകാരം, മെറ്റയുടെ ഉൽപ്പന്നങ്ങൾ ഉപയോക്താക്കളിൽ അമിതമായ ഉപയോഗത്തിന് പ്രേരിപ്പിക്കുന്നുവെന്നും കുട്ടികളെ ഹാനികരമായ ഉള്ളടക്കങ്ങൾക്ക് വിധേയരാക്കുന്നുവെന്നും 13 വയസ്സിന് താഴെയുള്ള ഉപയോക്താക്കളുടെ വിവരങ്ങൾ നിയമവിരുദ്ധമായി ശേഖരിക്കുന്നുവെന്നുമുള്ള യു.എസ് സംസ്ഥാനങ്ങളുടെ ആരോപണങ്ങൾ പരിഹരിക്കാനാണ് ശ്രമം. മെറ്റയ്‌ക്കെതിരായ പ്രധാന വിചാരണ ഈ കരാർ അവസാനിപ്പിക്കുന്നുണ്ടെങ്കിലും, യു.എസിൽ കമ്പനി ഇപ്പോഴും നേരിടുന്ന ആയിരക്കണക്കിന് പേഴ്സണൽ ഇഞ്ച്വറി ക്ലെയിമുകളോ സ്കൂൾ ഡിസ്ട്രിക്ടുകൾ നൽകിയ പ്രത്യേക കേസുകളോ ഇതിലൂടെ പരിഹരിക്കപ്പെടുന്നില്ല.

മെറ്റ എത്ര തുക നൽകും?

നിർദ്ദിഷ്ട ഒത്തുതീർപ്പ് പ്രകാരം മെറ്റ ഏകദേശം 11.7 ബില്യൺ ഡോളർ 10 വർഷത്തിനുള്ളിൽ നൽകും. എതിരാളികളായ മറ്റ് സോഷ്യൽ മീഡിയ പ്ലാറ്റ്‌ഫോമുകളും സമാനമായ ഒത്തുതീർപ്പുകൾക്ക് സമ്മതിക്കുകയാണെങ്കിൽ മെറ്റയ്ക്ക് മറ്റൊരു 5 ബില്യൺ ഡോളർ വരെ നൽകേണ്ടി വരും. ഇതോടെ കരാറിന്റെ പരമാവധി മൂല്യം 16.7 ബില്യൺ ഡോളറിലെത്തും. സംസ്ഥാനങ്ങളുടെ നിയമപരമായ ചെലവുകൾക്കായി മെറ്റ 75 മില്യൺ ഡോളർ നൽകുമെന്നും കേംബ്രിഡ്ജ് അനലിറ്റിക്ക ഡാറ്റാ വിവാദവുമായി ബന്ധപ്പെട്ട പഴയ ക്ലെയിമുകൾ പരിഹരിക്കുന്നതിനായി 459 മില്യൺ ഡോളർ കൂടി നൽകുമെന്നും നിർദ്ദിഷ്ട കരാറിൽ പറയുന്നു.

യുവജന മാനസികാരോഗ്യ സേവനങ്ങൾ, പ്രതിസന്ധി ഘട്ടങ്ങളിൽ സഹായം നൽകുന്ന ക്രൈസിസ് ലൈനുകൾ, സ്കൂളിനു ശേഷമുള്ള പ്രവർത്തനങ്ങൾ, ഡിജിറ്റൽ സാക്ഷരതാ പദ്ധതികൾ എന്നിവയ്ക്കായി സംസ്ഥാനങ്ങൾ ഒത്തുതീർപ്പ് തുക ഉപയോഗിക്കുമെന്നാണ് പ്രതീക്ഷിക്കുന്നത്. എന്നാൽ തുക എങ്ങനെ ചെലവഴിക്കണമെന്ന് തീരുമാനിക്കുന്നത് അതത് സ്റ്റേറ്റ് ലെജിസ്ലേറ്റുകളായിരിക്കും. ഈ നടപടികളും മെറ്റയുടെ കൗമാര സുരക്ഷാ നിയന്ത്രണങ്ങൾ ശക്തമാക്കുന്നതിന്റെ ഭാഗമായാണ് പരിഗണിക്കുന്നത്. മാത്രമല്ല യു.എസ് ജില്ലാ ജഡ്ജി ഇവോൺ ഗോൺസാലസ് റോജേഴ്സിന്റെ അംഗീകാരം ഈ കരാറിന് ഇനിയും ആവശ്യവുമാണ്.

കൗമാരക്കാർക്ക് രാത്രിയിൽ ഇൻസ്റ്റാഗ്രാമും ഫേസ്ബുക്കും ഉപയോഗിക്കാൻ കഴിയുമോ?

മെറ്റ കൗമാര സുരക്ഷാ നിയന്ത്രണങ്ങൾ പ്രകാരമുള്ള പ്രധാന നിർദേശങ്ങളിലൊന്ന് രാത്രികാല സോഷ്യൽ മീഡിയ ഉപയോഗം പരിമിതപ്പെടുത്തുന്നതാണ്. നിർദ്ദിഷ്ട വ്യവസ്ഥകൾ പ്രകാരം ആറ് മാസത്തിനുള്ളിൽ, പ്രാദേശിക സമയം രാത്രി 12 മണി മുതൽ പുലർച്ചെ 6 മണി വരെ കൗമാരക്കാരുടെ അക്കൗണ്ടുകളിൽ ഫേസ്ബുക്കിന്റെയും ഇൻസ്റ്റാഗ്രാമിന്റെയും പ്രധാന ഉപയോഗം സ്വയം നിയന്ത്രിക്കപ്പെടും.

ഈ സമയത്ത് കൗമാരക്കാർക്ക് പരിമിതമായ സന്ദേശമയയ്ക്കലും ചില അക്കൗണ്ട് ക്രമീകരണങ്ങളും ഉപയോഗിക്കാൻ കഴിയുമെങ്കിലും പ്ലാറ്റ്‌ഫോമുകളുടെ സാധാരണ ഉപയോഗം പരിമിതപ്പെടുത്തും. അതേസമയം, രാത്രി 10 മണി മുതൽ രാവിലെ 7 മണി വരെ കൗമാരക്കാരുടെ അക്കൗണ്ടുകളിലേക്കുള്ള പുഷ് നോട്ടിഫിക്കേഷനുകൾ മെറ്റ ഓഫ് ചെയ്യുമെന്നും റിപ്പോർട്ടുണ്ട്. എതിരാളികളായ മറ്റ് പ്ലാറ്റ്‌ഫോമുകളും സമാന കരാറുകളിൽ ഒപ്പുവെക്കുകയാണെങ്കിൽ രാത്രികാല നിയന്ത്രണം കൂടുതൽ ശക്തമാക്കി രാത്രി 10 മണി മുതൽ രാവിലെ 7 മണി വരെ വ്യാപിപ്പിക്കാനും സാധ്യതയുണ്ട്. ഈ കൗമാര സുരക്ഷാ നിയന്ത്രണങ്ങൾ സോഷ്യൽ മീഡിയ ഉപയോഗം കൂടുതൽ സുരക്ഷിതമാക്കുന്നതിനുള്ള പ്രധാന നടപടികളിലൊന്നായിരിക്കും.

പ്രതിദിന സ്ക്രീൻ ടൈം പരിധി

സോഷ്യൽ മീഡിയ സ്ക്രീൻ ടൈം കുറയ്ക്കുക എന്ന ലക്ഷ്യത്തോടെ മെറ്റയുടെ വിവിധ ആപ്പുകളിലുടനീളം കൗമാരക്കാരുടെ അക്കൗണ്ടുകൾക്ക് പ്രതിദിനം രണ്ട് മണിക്കൂർ എന്ന ഡിഫോൾട്ട് പരിധി ഏർപ്പെടുത്താനാണ് നിർദേശം. ഈ പരിധി ഓരോ ദിവസവും അർദ്ധരാത്രിയിൽ പുനഃക്രമീകരിക്കപ്പെടും. എന്നാൽ സന്ദേശമയയ്ക്കലും ദീർഘനേരമുള്ള വീഡിയോകളും ഈ പരിധിയിൽ ഉൾപ്പെടില്ല.

മാതാപിതാക്കളുടെ അനുമതിയില്ലാതെ കൗമാരക്കാർക്ക് ഈ നിയന്ത്രണം മാറ്റാൻ കഴിയില്ല. അതേസമയം, കുട്ടികളുടെ സോഷ്യൽ മീഡിയ ഉപയോഗം കൂടുതൽ പരിമിതപ്പെടുത്തണമെന്ന് മാതാപിതാക്കൾ ആഗ്രഹിക്കുന്നുവെങ്കിൽ കൂടുതൽ കർശനമായ പരിധികളും ഏർപ്പെടുത്താൻ കഴിയും. മെറ്റയുമായി മത്സരിക്കുന്ന പ്ലാറ്റ്‌ഫോമുകളും സമാന നടപടികൾ സ്വീകരിക്കുകയാണെങ്കിൽ, ദിവസേനയുള്ള രണ്ട് മണിക്കൂർ എന്ന പൊതുപരിധി നിലനിർത്തിക്കൊണ്ടുതന്നെ മെറ്റയുടെ ഓരോ ആപ്പിനും അനുവദിക്കുന്ന സമയം 60 മിനിറ്റായി കുറയ്ക്കാൻ സാധ്യതയുണ്ട്. ഇത്തരം കൗമാര സുരക്ഷാ നിയന്ത്രണങ്ങൾ കുട്ടികളുടെ സോഷ്യൽ മീഡിയ ഉപയോഗം കൂടുതൽ സുരക്ഷിതവും നിയന്ത്രിതവുമാക്കാൻ ലക്ഷ്യമിടുന്നു.

സ്കൂൾ സമയത്ത് എന്ത് മാറ്റമുണ്ടാകും?

കൗമാരക്കാരുടെ പഠനസമയത്തെ സോഷ്യൽ മീഡിയ ഇടപെടൽ കുറയ്ക്കുന്നതും മെറ്റ കൗമാര സുരക്ഷാ നിയന്ത്രണങ്ങളുടെ ഭാഗമാണ്. നിർദ്ദിഷ്ട അക്കാദമിക് വർഷത്തിൽ പ്രവൃത്തിദിനങ്ങളിൽ രാവിലെ 8 മണി മുതൽ ഉച്ചയ്ക്ക് 3 മണി വരെ കൗമാരക്കാരുടെ അക്കൗണ്ടുകളിലേക്കുള്ള നോട്ടിഫിക്കേഷനുകൾ മെറ്റ നിശബ്ദമാക്കും.

സ്കൂൾ സമയത്തെ അനാവശ്യ തടസ്സങ്ങൾ കുറയ്ക്കുകയും പകൽ സമയത്ത് ഫേസ്ബുക്ക്, ഇൻസ്റ്റാഗ്രാം തുടങ്ങിയ പ്ലാറ്റ്‌ഫോമുകളുമായുള്ള നിരന്തര ഇടപെടൽ നിയന്ത്രിക്കുകയുമാണ് ഇതിലൂടെ ലക്ഷ്യമിടുന്നത്. മാതാപിതാക്കൾക്ക് ആവശ്യമായ സാഹചര്യങ്ങളിൽ സ്കൂൾ സമയത്തെ നിയന്ത്രണങ്ങളിൽ മാറ്റം വരുത്താനുള്ള സംവിധാനവും ലഭിക്കും.

ഇൻസ്റ്റാഗ്രാമിന്റെ അൽഗോരിതം മാറുമോ?

കൗമാര ഉപയോക്താക്കൾക്കായി ഇൻസ്റ്റാഗ്രാമിന്റെ കണ്ടന്റ് സജസ്ഷൻ സംവിധാനത്തിലും മാറ്റം വരുത്താനാണ് നിർദേശം. കരാർ പ്രാബല്യത്തിൽ വന്നാൽ നാല് മാസത്തിനുള്ളിൽ, അൽഗോരിതം അടിസ്ഥാനമാക്കി വ്യക്തിഗതമാക്കാത്ത ഒരു ഫീഡ് കൗമാരക്കാർക്ക് നൽകാൻ മെറ്റയോട് ആവശ്യപ്പെടും. കമ്പനി ഡിഫോൾട്ടായി “ലൈക്ക്” കൗണ്ടുകളും മറയ്ക്കും. ശരീരഘടനയെയും രൂപത്തെയും കുറിച്ചുള്ള അനാരോഗ്യകരമായ താരതമ്യങ്ങളെ പ്രോത്സാഹിപ്പിക്കുന്ന ഫീച്ചറുകളെക്കുറിച്ചുള്ള ആശങ്കകൾ പരിഹരിക്കുന്നതിനായി ചില കോസ്മെറ്റിക്, ബ്യൂട്ടി ഫിൽട്ടറുകൾ കൗമാര ഉപയോക്താക്കൾക്ക് നിരോധിക്കുമെന്നും നിർദ്ദിഷ്ട കരാറിൽ പറയുന്നു.

ഉപയോക്താക്കളുടെ പ്രായം മെറ്റ എങ്ങനെ പരിശോധിക്കും?

പ്രായപരിശോധന ഈ ഒത്തുതീർപ്പിലെ ഏറ്റവും പ്രധാനപ്പെട്ട വിഷയങ്ങളിലൊന്നാണ്. യങ്ങർ യൂസേർസിനെ തിരിച്ചറിയുന്നതിനായി നിർദ്ദിഷ്ട മാനദണ്ഡങ്ങൾ പാലിക്കുന്ന പ്രായം ഉറപ്പുവരുത്തൽ സംവിധാനം വിന്യസിക്കാൻ മെറ്റയ്ക്ക് ഒരു വർഷത്തെ സമയം ലഭിക്കും. 14 ദിവസത്തിനുള്ളിൽ പ്രായം സ്ഥിരീകരിക്കാൻ കഴിയാത്ത അക്കൗണ്ടുകൾ, ഉപയോക്താവ് നൽകിയ പ്രായം എന്തുതന്നെയായാലും, കൗമാരക്കാരുടേതായി കണക്കാക്കപ്പെടും.

യു.എസ് നിയമപ്രകാരം പ്ലാറ്റ്‌ഫോമുകൾ ഉപയോഗിക്കുന്നതിൽ നിന്ന് വിലക്കപ്പെട്ട 13 വയസ്സിന് താഴെയുള്ള കുട്ടികളെ തിരിച്ചറിയുന്നതിനുള്ള അധിക സുരക്ഷാ സംവിധാനങ്ങളും കരാറിൽ ഉൾപ്പെടുത്തിയിട്ടുണ്ട്. ഉചിതമായ സാഹചര്യങ്ങളിൽ ഒരു അക്കൗണ്ട് 13 വയസ്സിന് താഴെയുള്ള കുട്ടിയുടേതാണെന്ന് മെറ്റ അനുമാനിക്കേണ്ടതുണ്ട്. കൂടാതെ, മുമ്പ് ഇല്ലാതാക്കിയ പ്രായപൂർത്തിയാകാത്തവരുടെ അക്കൗണ്ടുകളുമായി ബന്ധപ്പെട്ട ഫ്രണ്ട് നെറ്റ്‌വർക്കുകൾ പരിശോധിച്ച് മറ്റ് പ്രായപൂർത്തിയാകാത്ത ഉപയോക്താക്കളെയും തിരിച്ചറിയുന്നതിനുള്ള നടപടികളും സ്വീകരിക്കേണ്ടിവരും. ഇത്തരം കൗമാര സുരക്ഷാ നിയന്ത്രണങ്ങൾ കുട്ടികളുടെ ഓൺലൈൻ സുരക്ഷ കൂടുതൽ ശക്തമാക്കാൻ ലക്ഷ്യമിടുന്നു.

മാതാപിതാക്കൾക്ക് എന്ത് നിയന്ത്രണം ലഭിക്കും?

കൗമാരക്കാരുടെ അക്കൗണ്ടുകൾ നിരീക്ഷിക്കുന്ന മാതാപിതാക്കൾക്ക് കുട്ടികൾ മെറ്റയുടെ പ്ലാറ്റ്‌ഫോമുകളിൽ എത്ര സമയം ചെലവഴിക്കുന്നു എന്നതിനെക്കുറിച്ചുള്ള പ്രതിദിന വിവരങ്ങൾ ലഭിക്കും. അക്കൗണ്ട് ക്രമീകരണങ്ങൾ അവലോകനം ചെയ്യുന്നതിനുള്ള നിർദേശങ്ങളും മാതാപിതാക്കൾക്ക് നൽകും. കുട്ടികളുടെ ആവശ്യങ്ങൾക്കനുസരിച്ച് സ്കൂൾ സമയത്തെ നിയന്ത്രണങ്ങളിൽ മാറ്റം വരുത്താനുമാകും.

അതേസമയം, ഇംഗ്ലീഷിലോ സ്പാനിഷിലോ സമർപ്പിക്കുന്ന കേസുകളിൽ കുറഞ്ഞത് 90 ശതമാനം കേസുകളിലും, നിയമവിരുദ്ധമോ അപകീർത്തികരമോ ആയ ഉള്ളടക്കങ്ങളെക്കുറിച്ച് കൗമാരക്കാർ നൽകുന്ന റിപ്പോർട്ടുകൾക്ക് ആറ് മണിക്കൂറിനുള്ളിൽ മറുപടി നൽകാൻ മെറ്റയോട് കരാർ ആവശ്യപ്പെടുന്നു. ഇത്തരം കൗമാര സുരക്ഷാ നിയന്ത്രണങ്ങൾ കൗമാരക്കാരുടെ പരാതികളിൽ വേഗത്തിലുള്ള നടപടികൾ ഉറപ്പാക്കാനും ലക്ഷ്യമിടുന്നു.

എന്തുകൊണ്ട് യു.എസ് സ്റ്റേറ്റുകൾ മെറ്റയ്ക്കെതിരെ കോടതിയിലെത്തി?

യുവ ഉപയോക്താക്കളെ ഫേസ്ബുക്കിലും ഇൻസ്റ്റാഗ്രാമിലും കൂടുതൽ സമയം ചെലവഴിക്കാൻ പ്രേരിപ്പിക്കുന്ന രീതിയിലാണ് മെറ്റ ഈ പ്ലാറ്റ്‌ഫോമുകൾ മനഃപൂർവം രൂപകൽപ്പന ചെയ്തതെന്നാണ് യു.എസ് സ്റ്റേറ്റുകളുടെ പ്രധാന ആരോപണം. വ്യക്തിഗതമാക്കിയ കണ്ടന്റ് സജസ്ഷൻസ്, നിരന്തര നോട്ടിഫിക്കേഷനുകൾ, ഉപയോക്താക്കളെ വീണ്ടും വീണ്ടും പ്ലാറ്റ്‌ഫോമിലേക്ക് തിരികെ കൊണ്ടുവരുന്ന മറ്റ് സംവിധാനങ്ങൾ എന്നിവയാണ് കേസിന്റെ പ്രധാന ശ്രദ്ധാകേന്ദ്രം.ഈ ഫീച്ചറുകൾ ഉപയോക്താക്കളിൽ നിർബന്ധിതമായ സോഷ്യൽ മീഡിയ ഉപയോഗത്തിന് കാരണമാകുമെന്നും സ്റ്റേറ്റ് ആരോപിച്ചു.

കുട്ടികളുടെ സ്വകാര്യത സംരക്ഷിക്കുന്ന നിയമങ്ങൾ മെറ്റ ലംഘിച്ചുവെന്നും യുവ ഉപയോക്താക്കളെ സംരക്ഷിക്കാൻ ലക്ഷ്യമിട്ടുള്ള സുരക്ഷാ സംവിധാനങ്ങളുടെ ഫലപ്രാപ്തിയെക്കുറിച്ച് പൊതുജനങ്ങളെ തെറ്റിദ്ധരിപ്പിച്ചുവെന്നും സ്റ്റേറ്റുകൾ കുറ്റപ്പെടുത്തി. ടൊബാക്കോ കമ്പനികൾക്കെതിരായ മുൻകാല വ്യവഹാരങ്ങളുമായും ഈ ആരോപണങ്ങൾ താരതമ്യം ചെയ്യപ്പെട്ടിട്ടുണ്ട്. തങ്ങളുടെ ഉൽപ്പന്നങ്ങൾ ഉണ്ടാക്കിയേക്കാവുന്ന ദോഷങ്ങളെക്കുറിച്ച് പൊതുജനങ്ങളോട് വെളിപ്പെടുത്തിയതിലധികം കാര്യങ്ങൾ കമ്പനികൾക്ക് അറിയാമായിരുന്നുവെന്നാണ് വാദികളുടെ നിലപാട്. മെറ്റ ഈ ആരോപണങ്ങൾ നിരന്തരം നിഷേധിച്ചിട്ടുണ്ട്. നിർദ്ദിഷ്ട ഒത്തുതീർപ്പ് കമ്പനിയുടെ ഭാഗത്തുനിന്നുള്ള ബാധ്യതയുടെയോ തെറ്റിന്റെയോ വെളിപ്പെടുത്തലല്ലെന്നും കരാറിൽ വ്യക്തമാക്കുന്നു. ഇത്തരം കൗമാര സുരക്ഷാ നിയന്ത്രണങ്ങൾ ശക്തമാക്കുന്നതിനുള്ള നടപടികളാണ് കരാറിന്റെ ഭാഗമായി ഉൾപ്പെടുത്തിയിരിക്കുന്നത്.

വിചാരണയ്ക്കിടെ എന്താണ് സംഭവിച്ചത്?

കാലിഫോർണിയയിലെ ഫെഡറൽ കോടതിയിൽ നടന്ന വിചാരണയുടെ രണ്ടാം ആഴ്ചയിലാണ് ഒത്തുതീർപ്പിലെത്തിയതെന്നാണ് റിപ്പോർട്ടുകൾ. ഇൻസ്റ്റാഗ്രാം മേധാവി ആദം മൊസ്സേരി ഇതുസംബന്ധിച്ച മൊഴി നൽകിയിരുന്നു. പുതുതായി അവതരിപ്പിച്ച ചില കൗമാര സുരക്ഷാ നടപടികൾ പ്രാരംഭ പരിശോധനകളിൽ കുറഞ്ഞ സ്വീകാര്യതയാണ് നേടിയതെന്ന് വെളിപ്പെടുത്താതെയാണ് അവ പ്രോത്സാഹിപ്പിച്ചതെന്ന് അദ്ദേഹം സമ്മതിച്ചതായാണ് റിപ്പോർട്ടുകൾ.

മെറ്റയുടെ ചില സുരക്ഷാ നടപടികൾ ഫലപ്രദമല്ലെന്ന് കമ്പനിക്ക് അറിയാമായിരുന്നുവെന്നും ചില ടൂളുകൾ ഫലപ്രദമാകാത്ത രീതിയിലാണ് രൂപകൽപ്പന ചെയ്തതെന്നും മറ്റ് സാക്ഷികൾ ആരോപിച്ചു. ഒത്തുതീർപ്പ് വിചാരണ അവസാനിപ്പിക്കുന്നതിന് മുമ്പ് മെറ്റ സി.ഇ.ഒ മാർക്ക് സക്കർബർഗ് മൊഴി നൽകുമെന്നാണ് പ്രതീക്ഷിച്ചിരുന്നത്.

ഈ ഒത്തുതീർപ്പ് മെറ്റയുടെ നിയമപ്രശ്നങ്ങൾ അവസാനിപ്പിക്കുമോ?

ഈ കരാർ കേസിൽ ഉൾപ്പെട്ട യു.എസ് സംസ്ഥാനങ്ങൾ ഉന്നയിച്ച പ്രത്യേക ക്ലെയിമുകൾ മാത്രമാണ് പരിഹരിക്കുന്നത്. മെറ്റയ്‌ക്കെതിരെ വ്യക്തികളിൽ നിന്നുള്ള ആയിരക്കണക്കിന് വ്യക്തിഗത കേസുകളും വിവിധ സ്കൂൾ ജില്ലകൾ നൽകിയ പ്രത്യേക വ്യവഹാരങ്ങളും ഇപ്പോഴും നിലനിൽക്കുന്നുണ്ട്. കുട്ടികളോടും കൗമാരക്കാരോടുമുള്ള പ്ലാറ്റ്‌ഫോമുകളുടെ സമീപനത്തിന്റെ പേരിൽ കമ്പനി മറ്റ് നിയമനടപടികളും നേരിടുന്നുണ്ട്.

എന്നാൽ, മെറ്റ കൗമാര സുരക്ഷാ നിയന്ത്രണങ്ങൾ സോഷ്യൽ മീഡിയ വ്യവസായത്തിൽ വലിയ സ്വാധീനം ചെലുത്താൻ സാധ്യതയുണ്ട്. പ്രത്യേകിച്ച് ടിക് ടോക്, യൂട്യൂബ്, മറ്റ് പ്രമുഖ പ്ലാറ്റ്‌ഫോമുകൾ എന്നിവയും സമാനമായ നിയന്ത്രണങ്ങൾ സ്വീകരിക്കുകയാണെങ്കിൽ കൗമാരക്കാരുടെ സോഷ്യൽ മീഡിയ ഉപയോഗവുമായി ബന്ധപ്പെട്ട പുതിയ വ്യവസായ മാനദണ്ഡങ്ങൾക്ക് ഇത് വഴിയൊരുക്കും. “കൗമാരക്കാർ ഡസൻ കണക്കിന് ആപ്പുകളിലൂടെ സുഗമമായി സഞ്ചരിക്കുന്നതിനാൽ നമുക്കൊരു വ്യവസായവ്യാപകമായ പരിഹാരം ആവശ്യമാണ്,” എന്ന് മെറ്റയുടെ ചീഫ് ലീഗൽ ഓഫീസർ സി.ജെ. മഹോണി വ്യവസായവ്യാപകമായ സമീപനത്തിന് ആഹ്വാനം ചെയ്തതായി റിപ്പോർട്ടുകൾ പറയുന്നു.

സംസ്ഥാനങ്ങളുമായി ഒത്തുതീർപ്പിലെത്തുന്നത് മെറ്റയുടെ മൊത്തത്തിലുള്ള നിയമബാധ്യതകൾ പരിമിതപ്പെടുത്താനുള്ള മാർഗമായേക്കാമെന്ന് നിയമവിദഗ്ധർ ചൂണ്ടിക്കാട്ടുന്നു. അതിനാൽ സാമ്പത്തിക ഒത്തുതീർപ്പെന്നതിലുപരി ഈ കരാർ വലിയ പ്രാധാന്യമുള്ളതാകാം. പ്രമുഖ സോഷ്യൽ മീഡിയ പ്ലാറ്റ്‌ഫോമുകൾ കൗമാരക്കാരായ ഉപയോക്താക്കൾക്കായി തങ്ങളുടെ ഉൽപ്പന്നങ്ങൾ എങ്ങനെ രൂപകൽപ്പന ചെയ്യണം, നിരീക്ഷിക്കണം, നിയന്ത്രിക്കണം എന്നതിൽ കൗമാര സുരക്ഷാ നിയന്ത്രണങ്ങൾ പുതിയ മാനദണ്ഡത്തിന് തുടക്കമിടാൻ സാധ്യതയുണ്ട്.